Trygd

Í neyðstøðu á sjónum skalt tú senda neyðarkall á VHF-rás 16. Hav altíð rás 16 opna. Nýt VHF fyrst og fartelefon í aðru røð.

MRCC heitir á øll, sum sigla:

• Sigl ikki ávirkaður.
• Sigl ikki troyttur ella móður.
• Hav kravdu bjargingarútgerðina umborð.
• Royn radioútgerðina regluliga. Kalla Tórshavn Radio og bið um eina radioroynd. Enda kallið við at siga, hvørjari rás tú ert á. Royndin er ókeypis.
• Nýt vit og skil og góðan sjómansskap.

Ver í bjargingarvesti undir sigling. Í minsta lagi tveir bátar skulu fylgjast.

Ver liggjandi millum kl. 22.00 leygarkvøld og kl. 10.00 sunnumorgun. Sigl ikki í hesum tíðarskeiði.

MRCC hevur telefon 351300 og heimasíðuna www.mrcc.fo.

Fyri smábátar verður víst til Løgtingslóg nr. 25 frá 12. apríl 2006 um bjargingarútgerð á opnum bátum og førum undir 20 tons (BT). Lógin er á www.logir.fo.

Bátabrúgvarnar liggja út frá keiini. Størri bátar og dekksfør liggja fram við bryggjukantinum móti Havnaskrivstovuni. Pláss er fyri umleið 120 bátum. Sí kortið yvir økið.

Bátshakar og bjargingarkransar eru sjónligir:

• Á hvørjari bátabrúgv.
• Á keiini við landgongdirnar.
• Við flakavirkið.
• Á el-steyrum á keiøkinum.

Trygdarnet við bátabrúgv skulu fyribyrgja, at fólk detta á sjógv. Net at heingja millum bát og brúgv eru eisini tøk á økinum og skullu bátar seta upp net um vandi er at detta niður ímillum bát og brúgv.

Um onkur dettur á sjógv:

1. Royn at fáa viðkomandi upp skjótast gjørligt.
2. Veit fyrstuhjálp alt fyri eitt.
3. Send boð eftir lækna, um neyðugt.
4. Ring til samarittarnar á 283629. Norðoya Bjargingarfelag hevur fólk á staðnum á 224148 og 285900. Tú kanst eisini ringja 112.

Um eldur kemur í ein bát við bátabrúgvarnar:

1. Bjarga teimum, sum eru í vanda.
2. Fá øll úr bátinum upp á land.
3. Flyt bátin burtur frá øðrum bátum.
4. Royn at sløkkja.
5. Ring 112.

Fýra stórar hurðar eru í tjaldinum, tvær á hvørjari síðu. Eisini eru smærri hurðar. Neyðútgongdirnar eru merktar við EXIT-skeltum.

Síðurnar á tjaldinum kunnu takast niður, um neyðugt er at fáa fólk skjótt út.

Pulvursløkkjarar, CO2-sløkkjarar og eldteppi eru á sjónligum støðum í tjaldinum. Har matur verður gjørdur, skal vera ein 6 kg pulvursløkkjari og eitt eldteppi.

Um eldur kemur í:

1. Bjarga teimum, sum eru í lívsvanda.
2. Ring 112. Sig, hvar eldur er í, og gev upplýsingarnar, sum standa undir «Tá ið tú ringir 112».
3. Fá øll út skjótast gjørligt. Far til nærmastu úthurð. Øll, sum eru í vanda av royki ella eldi, skulu út.
4. Royn at sløkkja eldin og lata hurðar og vindeygu aftur. Um einki er at gera, far út.
5. Far til savningarstaðið við frostgoymsluna.
6. Greið løgreglu og sløkkiliði frá støðuni, tá tey koma.

Húsvognar standa á havnalagnum. Tað skulu vera í minsta lagi 4 metur millum teir. Sí kortið yvir økið.

Halt koyribreytina fría, so neyðsynjarakfør altíð sleppa fram til allar húsvognarnar.

Ein pulvursløkkjari er í billettskúrinum.

Um eldur kemur í ein húsvogn:

1. Bjarga teimum, sum eru í vanda.
2. Fá øll út skjótast gjørligt.
3. Royn at sløkkja.
4. Ring 112 og boða frá.

Samarittarnir frá Reyða Krossi halda til á Havnaskrivstovuni. Ring á 283629.

Teir eru á stevnuøkinum:

• Hósdagin frá kl. 20.00 til kl. 00.00.
• Fríggjadagin frá kl. 20.00 til kl. 02.00.
• Leygardagin frá kl. 20.00 til sunnumorgun kl. 06.00.

Samarittarnir eru útbúnir at veita skjóta fyrstuhjálp á skaðastaðnum. Teir kunnu:

• Geva lívbjargandi fyrstuhjálp. Allir eru útbúnir at nýta hjartastartara.
• Geva sálarliga fyrstuhjálp.
• Geva lækna og sjúkrabilastarvsfólki lívsumráðandi upplýsingar.
• Geva vanliga fyrstuhjálp.

Ring 112 alt fyri eitt, um okkurt álvarsligt hendir.

Heyganesgøta, brekkan við Skipasmiðjuna, er stongd fyri bilferðslu. Neyðsynjarakfør sleppa altíð ígjøgnum.

Á Bakkavegi er koyring báðar vegir fram við Skivuni og út móti Grótbrotinum. Vanliga er einvegis ferðsla har. Fylg ferðsluskeltunum.

Innkoyring á keiøkið uttan fyri Skivuna er bannað. Avmarka bilferðslu á havnalagnum mest møguligt.

Parkeringspláss eru:

• Við Fiskivinnuskúlan inni á Fjørð: umleið 90 pláss.
• Við Vestpack inni á Fjørð: umleið 50 pláss.
• Oman fyri Atlantis: umleið 30 pláss.
• Í Grótbrotinum: umleið 70 pláss.
• Við Missjónshúsið og kirkjugarðin: umleið 25 pláss.
• Við ítróttarhøllina: umleið 60 pláss.

Eisini verður víst til breiðu vegirnar, til dømis Ovaraveg og Miðalsbrekku.

Halt leiðirnar fríar. Neyðsynjarakfør skulu altíð sleppa til og frá økinum og fram á øllum stevnuøkinum.

WC eru á Havnaskrivstovuni. WC-vognar standa:

• Við Gomlu Brannstøðina.
• Við flakavirkið.
• Innan fyri girðingina yvir móti brúnni.

Eftirlit er við WC-unum, og tey verða gjørd rein regluliga.

Húsvognar og bátar kunnu tøma kloakkina í rottangan við maskinverkstaðið og flakavirkið.

Stórar ruskbingjur frá IRF standa:

• Við bátabrúgvarnar.
• Við Gomlu Brannstøðina.
• Við flakavirkið.

Smærri ruskbingjur og ruskíløt eru á keiøkinum og í tjaldinum.